Nagpa-Bombo ang Secretary sang vendors’ association sa Mandurriao, Iloilo City bangud sang ginapahayag nga indi patas nga pagtratar sa ila bilang mga manugbaligya nga nagaapekto na pati sa ila nga benta.
Sa interview sang Bombo Radyo kay Rolyn Gallaza, iya ginpahayag nga may iban sa ila kaupdanan nga vendors nga yara gihapon sa bag-o nga market apisar nga ginmanduan na sila nga magbalik sa daan nga merkado.
Bangud nga nakaseparar ang iban nga vendors, didto man sa new market nagasulod kag nagapaninda ang mga kustomer gani nga wala na sang income ang mga manugbaligya nga yara sa daan nga market.
Ginsaysay ni Gallaza nga sadtong malain ang tyempo, ginpasaylo sila anay sa bag-o nga merkado bangud sa mabaskog nga pag-ulan kag pagbaha.
Sang ginpabalik na sila sa daan nga market, nagsunod man sanday Gallaza, apang ginapahayag nga wala nagtuman ang iban nga vendors.
Gin-alegar ni Gallaza nga may “back up” kag “tinawo” si Mayor Raisa Treñas nga amo ang nagapa-isog sang buot sang mga vendor kun ngaa wala sila nagabiya sa new market apisar nga may instruction na mismo halin sa Local Economic Enterprise Office (LEEO).
“Ang daku gid nga nag-push sa amon nga problema, ang isa niya ka tinawo nga nagapasalig sa mga vendor sa sulod, amo na nga naga-isog ang ila buot. Siguro, wala na kabalo si Mayor nga may ara siya da tawo nga amo ang naga-back up sa mga vendors sa sulod,” suno kay Gallaza.
“Natingala ko nga gintagaan na sila sang ultimatum nga masaylo sang Sabado, pero asta subong, ano na nga adlaw, wala pa sila naghalin,” dugang niya.
Nagpanawagan man si Gallaza kay LEEO head Maricel Mabacquiao kag kay Mayor Treñas nga maghatag sang lihok sa ila nga sitwasyon.
Suno pa kay Gallaza, sang nakahibalo na si Mabaquiao sang problema, nagalaum kuntani sila nga may insigida nga hulag apang tubtub subong, didto gihapon ang iban nga vendors sa new market.
“Ngaa si Ma’am Maricel, wala siya sang immediate action? Nabal-an ya na (Mabaquiao) sang Monday nga ang mga vendors sa sulod sang bag-o nga merkado, wala nagtuman sa amon nga market in charge, ngaa until now, wala ya pa gin-action-an?” dugang sang nagpa-Bombo.
Ginakwestyon sini kun ngaa sila na gani ang nagsunod sa mandu, apang sila pa ang nagasuprer subong bangud sa gamay nga benta.
“Para sa amon, unfair man ina. Ngaa nga sila ya nga wala gasunod, sila pa ang naga-benepisyo? Kami nga naga-sunod, naga-antos. O, halos ang iban indi makabenta sa sulod sang isa ka adlaw. Habang sila didto, paldo-paldo, kami patay-patay. Kami nga nagasunod sa reglamento, kami pa ang naga-antos,” suno pa kay Gallaza.
May dugang ini nga panawagan kay Mayor Raisa: “I just don’t know kun aware si Mayor nga may ara siya da nga tawo nga masiling ko nga naga-waslik sang poder.”
Bukas ang Bombo Radyo sa mangin sabat sang opisina ni Mayor Raisa Treñas kag sang LEEO kaangot sa sini nga isyu.#
