Ginpanindugan ni DPWH Secretary Vince Dizon ang pagbalik sang ginbuhin nga ₱45 bilyon nga pondo sang ahensya para sa 2026 budget, kag ginpasiguro nga wala sang korapsyon nga matabo apisar nga nadula na ang pagsalig sang publiko bangod sang mga anomalya sa flood control projects sa ahensya.
Nahibaluan nga ginpanubo sang Senado ang ginaproponer nga budget sang DPWH halin sa ₱624.48 bilyon pakadto sa ₱570.48 bilyon.
Suno kay Dizon sa ginpatigayon nga bicameral conference committee kahapon nga adlaw, wala nila ginapangayo ang pagbalik sang mga specific projects sang flood control kundi ang pondo lamang agud masiguro nga mapatuman sa gihapon ang mga proyekto sang ahensya.
Gin-athag man sini nga ang pondo ginbase sa bag-o nga Construction Materials Price Data (CMPD) nga nagresulta sa mas manubo nga presyo sang mga materyales.
Ginpasiguro man ni Dizon nga ang pagpanubo sang presyo indi para ibalik ang daan nga mahal nga costing, kundi para mag-angot sa bag-o nga cost standards.
Samtang may mga senador nga nagapahayag sang kabalaka sa posible nga overpricing, gin-athag ni Dizon nga padayon kag consistent reform ang kinahanglan agud malikawan ang korapsyon sa ahensya.
