Nagpanguna ang West Visayas State University (WVSU) sa Top Performing Schools sa Elementary kag Secondary Level sa bag-o lang ginpaguwa nga resulta sang September kag November 2025 Licensure Examination for Teachers (LET).
Suno sa Professional Regulation Commission (PRC), sa elementary level, 134 sa 135 ka mga estudyante sang WVSU ang nakapasar sa exam ukon katumbas sang rating nga 99.26%.
Sa secondary level, 241 sa 242 examinees ang nakapasar. May rating ang unibersidad nga 99.59%.
Duha man ka graduates sang Main Campus ang nalakip sa topnotchers sa secondary level. Ini amo sanday Bea Mae Balanza nga Rank 9 kag may rating nga 93.20%; kag si Francheska Kimberly Anne Louise Altes nga Rank 10 nga may rating nga 93.00%.
Sandig sa Silak Media, ang official student publication sang WVSU-College of Education, pareho nga graduates sang Bachelor of Secondary Education major in English ang duha ka nasambit nga topnotchers.
Suno naman sa report sang Forum-Dimensions, ang official student publication sang WVSU-Main Campus, ini ang una nga tion sa sulod sang pila ka mga tuig nga naka-produce sang topnotchers ang English majors.
Sa pihak nga bahin, sa record sang PRC, nagpang-anum man sa Top Performing Schools ang Iloilo Science and Technology University sa elementary level. 114 sa 123 examinees ang nakapasar ukon may rating nga 92.68%.
Ginpatigayon ang LET sang September 21, 2025 kag November 30, 2025 sa nanuhay-tuhay nga testing centers sa Pilipinas lakip na sa Iloilo.
