Ginpahanumdom sang Bureau of Fire Protection (BFP) Region VI sa publiko nga mag-doble halong gid sa pagbutang sang Christmas trees kag paggamit sang lights kadungan sang pagsaulog sang Paskwa kag Bag-ong Tuig.
Kabahin ini sang mas ginpasangkad nga kampanya sang talatapan agud nga malikawan ang mga sunog kadungan sang pagtilipon para sa nasambit nga mga selebrasyon.
Suno kay Fire Inspector Erruel Arraojo, Chief sang Community Relations Section-Fire Safety Enforcement Division sang BFP-6, iya ginpahayag nga dapat siguruhon nga awtorisado sang Department of Trade and Industry (DTI) ang lights.
Sa idalom sang pagsulundan sang DTI, ang lights dapat nga may yara sang required markings kaangay sang Import Commodity Clearance (ICC) sticker para sa imported items, ukon ang Philippine Standard (PS) mark para sa mga produkto nga diri ginhimo sa Pilipinas.
Magluwas diri, ginapangabay man sang BFP nga mag-check gid sang label kag i-check ang instructions, agud malikawan ang pagsugpon-sugpon sang lights nga lapaw na sa kapasidad sini ukon overloaded na.
Ginapanawagan man nga likawan ang octopus connection.
Ginapangabay man nga likawan ang indi awtorisado nga mga palupok.
Kun basehan ang lista sang Police Regional Office VI, ang mga ginadumilian nga palupok amo ang masunod: Watusi, Piccolo, Poppop, Five Star (Big), Pla-Pla, Lolo Thunder, Giant Bawang, Giant Whistle Bomb, Special, Atomic Bomb, Atomic Triangle, Large-Size Judas Belt, Goodbye De Lima, Hello Columbia, Goodbye Napoles, Super Yolanda, Mother Rockets, King Kong, Kwiton, Super Lolo, Goodbye Bading, Goodbye Philippines, Bin Laden, Coke-In-Can, Pillbox, Kabasi, Tuna, Goodbye Chismosa, Dart Bomb, GHP Nuclear, kag ang Boga.
Sa record sang BFP, halin Disyembre 1 tubtub 19, isa ang na-rekord nga fire incident sa syudad sang Iloilo nga mahimo maangot sa Christmas lights. Ini nga record ang mas manubo sang 75% ipaanggid sa kaangay man nga kaso sang tinalikdan nga tuig.
Nauna na nga ginpahayag sang BFP nga ipasaka ang status sang bilog nga bureau sa bilog nga pungsod sa red alert umpisa subong nga adlaw, Disyembre 23.
Ini nga status nagakahulugan sang 100% attendance sang personnel. Gina-require man ang mga personnel nga magpabilin sa ila opisina ukon estasyon para sa 24-oras nga monitoring kag agud nga mag-responde kun may kritikal nga insidente. Suspended man ang tanan nga aplikasyon para sa leave, magluwas lang sa sick leave.#
