Ginpasa na sang Department of Public Works and Highways (DPWH) sa Office of the Ombudsman ang tanan nga mga computer kag mga files sang anay DPWH undersecretary nga si Maria Catalina Cabral.
Suno pa sa DPWH nga ang pagpasa sang mga file ni Cabral ang kabahin sa pagsunod sa Subpoena Duces Tecum sang Ombudsman nga nagasugo sa ahensya nga ipagwa ang tanan nga computer sang nagtaliwan nga opisyal sang gobyerno.
Ginpangunahan nanday DPWH Undersecretaries Nicasio Conti, Arthur Bisnar, Ricardo Bernabe III kag Charles Calima Jr. ang turnover sa Ombudsman, nga amo ang nagapatigayon sang imbestigasyon batok sa government officials kag private individuals nga naangot sa flood control project anomalies.
Nalakip sa turnover ang mga dokumento kag iban nga requests for consideration sa pagprograma sa National Expenditures Program (NEP) sa nagligad nga 10 ka tuig.
Ginpasiguro man sang ahensya nga magakooperar ini sa otoridad kag iban pa nga ahensya nga nagauyat sang imbestigasyon.
Samtang, ginkumpirmar naman sang Philippine National Police nga nag-positibo sa antidepressant nga bulong ang lawas ni Cabral.
Ini ang naga-gwa sa inisyal nga toxicology report halin sa PNP Regional Forensic Unit–Cordillera Administrative Region kun sa diin nagpositibo ini sa citalopram nga isa ka antidepressant drugs.
Ang nasambit man nga bulong ang narekober man sang mga kapulisan sa ila ginpatigayon nga pag-imbestigar sa kwarto sang hotel ni Cabral sa Baguio.
Base man sa imbestigasyon nga wala sang nakit-an nga histopathological examination ukon terminal diseases sa lawas ni Cabral.
Una na nga ginkumpirmar ni Interior Secretary Jonvic Remulla nga base sa ila inisyal nga pagbusisi sa kamatayon ni Cabral nga nagpanginmatay ini paagi sa paglumpat sa pil-as sa Kennon Road sa Bengeut.
