Nakumpiskar sang Philippine National Police (PNP) ang masobra P1.224 million nga balor sang illegal nga palupok sa mga ginpatigayon nga operasyon sini sa bilog nga Pilipinas.
Naglab-ot sa 79,953 ka mga illegal nga palupok nga nagabalor sang PP1.224 million ang ila nakumpiskar halin kahapon Disyembre 28.
Ang illegal nga mga palupok nakumpiskar halin sa pampubliko nga balaligyaan, mga nagabaligya sa kilid dalan kag mga checkpoint nga ginapatigayon sang kapulisan bag-o ang pag-sug-alaw sang bag-ong tuig.
Suno kay PNP acting chief Lieutenant Jose Melencio Nartatez Jr. ang mga nakumpiskar nga mga palupok ila igababad sa tubig nga nagikan naman sa Bureau of Fire Protection (BFP), para indi na magamit ang mga ini.
Ang ini nga lihok ginapatigayon agud mabuhinan ang posible aksidente nga matabo may kaangtanan sa palupok nga ginabawalan ibaligya bangud delikado.
Sa bilog nga pungsod, nagpangbutang na ang mga Local Government Unit sang 765 firecracker zones nga ginabantayan sang 1,655 ka mga personnel sini.
