Ginhilway sang Thailand ang 18 ka mga soldado sang Cambodia nga gin-detain halin pa sang bulan sang Hulyo 2025 matapos ang bag-o nga kasugtanan sang ceasefire sang duha ka pungsod.
Natigayon ang pag-turn over sang 18 ka mga soldado kahapon nga adlaw paagi sa isa ka border checkpoint.
Ginpangunahan sang International Committee of the Red Cross ang pag-release sang mga soldado, nga ginpahayag bilang isa ka importante nga tikang agud mabalik ang kalinong sa tunga sang duha ka pungsod.
Suno sa Cambodia, halos lima ka bulan nga gin-detain ang mga soldado, samtang ginpahayag sang Thailand nga gintratar nila ini suno sa international humanitarian law.
Matandaan nga nagsugod ang mga engkwentro sa tunga sang Thailand kag Cambodia sang nagligad nga bulan kag nagpadayon sang halos 20 ka adlaw, nga nagresulta sa madamo nga napatay kag nag-evacuate nga mga sibilyan.
Bilang kabahin sang ceasefire, nagsugot ang Thailand nga hilwayon ang mga soldado matapos magpadayon ang kalinong sa sulod sang 72 ka oras, suno sa ila ginakasugtan.
