Ginpasalig sang Officer-in-Charge (OIC) sang Iloilo City Police Office (ICPO) nga matuman sini ang marching order sang alkalde sang syudad nga wala sang daku nga mga insidente para sa major events partikular sa Dinagyang Festival 2026 kag ASEAN Summit.
Suno kay Police Colonel Wilbert Parilla, maid-id nga pagplano kag koordinasyon ang ginahimo sang talatapan lakip na ang deployment para sa Dinagyang.
Wala ini sang plano subong nga pangbalasahon ang mga hepe sa mga estasyon sang pulis sa syudad, apang iga-evaluate suno sa iya ang performances sang mga personnel.
Target man ni Parilla nga ipabilin nga maayo ang performance sang ICPO, ilabi na nga ginhingadlan ini sa national level nga two-time Best City Police Office.
“We have to maintain the title hanggang sa maka-Grand Slam tayo,” suno sa OIC.
Sang ginpamangkot kun na-pressure bala ini nga malapawan ang accomplishments sa tion ni former city police director Colonel Kim Legada, iya ginpahayag nga, “Hindi madali… it’s a big shoe to fill in.” Apang dugang niya, “That would be a challenge for me. Hindi ko na inaasam na malampasan. Kahit mapantayan ko na lang ang nagawa ni Sir Kim because napakagaling ni Sir Kim.”
Si Parilla ang head sang Regional Intelligence Division sang Police Regional Office 6 nga nagbulos kay Colonel Roland Bulalacao nga amo ang nangin OIC sang ICPO sa sulod lamang sang apat ka adlaw.
Ang amo nga development ang kasunod sang pagkakas kay Legada bangud sa lapses sa imbestigasyon sa nangin kamatayon ni Duenas Vice Mayor Aimee Paz Lamasan sa La Paz nga ginaangot sa accidental firing.
