Nagpautwas sang kalain sang buot ang Ilongga beauty queen nga si Rabiya Mateo kagab-i, Enero 16, kasunod sang pagpang-bully nga iya naangkon online bangud sang simple gid lamang nga post kun sa diin siya pwede makakaon diri sa Iloilo City.
Sa social media post ni Rabiya, ginsapubliko man sini nga na-diagnose siya sang 2025 nga may Major Depressive Disorder with Anxious Distress.
Nalakip sa iya ginpakita amo ang medical certificate nga halin sa isa ka adult and pediatric psychiatrist nga napetsahan sang Enero 7, 2025. Nakabutang sa amo nga certificate nga kinahanglan nga magpahuway anay ang aktres sa professional duties para nga masiguro ang “complete recovery.”
“Everyday was a struggle to survive. I almost deactivated everything and disappear to have a quiet and peaceful life. I fought hard and still fighting up until now,” suno sa beauty queen-turned-actress.
“You don’t know how little kindness mean to a depressed person like me and how your words can push me to do something else,” dugang niya.
Sa separado sini nga post, nagpahayag si Rabiya nga wala siya sang plano nga isapubliko ang iya depression. Suno sa iya, tinuig niya ini nga ginhuptan sa iya lamang kaugalingon, kag tinuig man niya nga ginbatuan. Apang nasapubliko ini bangud sa natabo nga bullying.
“I planned to keep my depression to myself. Years of battling it every day. Years of trying to keep myself together. Bullying needs to stop now. It causes harm more than you ever know,” suno sa Miss Universe 2020.
Na-mensyonar pa sini ang Kindness Campaign nga mas nagtunog sadtong 2025 kasunod sang kamatayon ni Emman Atienza.
Si Emman amo ang actress-influencer nga anak ni Kuya Kim Atienza. Advocate siya sang mental health campaign, apang nasapwan ini nga patay sa iya apartment sa Santa Monica, California. Bangud sa amo nga hitabo, napahanumdom sa mga tawo sa amo nga tion nga mas mangin sensitibo ilabi na sa online platforms.
“Remember when we lost Emman Atienza? Damo sinyo posted about to spread kindness and love. Pero kamo ang number 1 mang bully sang isig katawo nyo. Your words can kill. Tandaan nyo na please,” suno kay Rabiya.
Ini nga posts sang aktres ang kasunod sang mga komento sa iya nauna nga pamangkot sa Facebook nga: “Iloilo na! Where to eat?” Bisan may mga sweet kag matarong nga mga komento, may mga indibidwal naman nga nang-bash kag nagbuya sang malain nga mga tinaga kay Rabiya.
Bangud sini, nag-post pa ang Ilongga queen: “I am always proud to be an Ilongga. Gin ubra ko guid best ko to represent syudad ta. Pero daw sobra2 naman ni baba sang iban nga tawo. Dugay nako gahipos. Permi nalang guid kamo ya.”
Nahibaluan nga si Rabiya nga tumandok sang Balasan ang yari subong sa Iloilo City bangud magapungko siya nga judge sa Miss Iloilo 2026 grand coronation night karon sa WVSU Cultural Center.
Matandaan nga gintiglawas sini ang Iloilo City sa Miss Universe Philippines sang 2020. Matapos nakuha ang korona, ginrepresentar niya ang Pilipinas sa international stage kag nagtapos bilang top 21 semifinalist.#
(Photos: Rabiya Mateo/Facebook)
