Posible nga may ipasaka nga reklamo batok sa Office of the House Secretary General matapos wala sini ginbaton ang duha ka magkasunod nga impeachment complaints nga ipasaka kuntani batok kay President Ferdinand “Bongbong” Marcos, Jr.
Natabo ini sang nag-file sang separado nga mga complaint ang Bagong Alyansang Makabayan kag ang grupo nanday former Anakalusugan Party-list Rep. Mike Defensor kag former Ilocos Sur Governor Luis “Chavit” Singson subong nga adlaw, Enero 22.
Ginrason sang opisina nga didto sa Taiwan si House Secretary General Cheloy Garafil agud magbaton sang award, kag wala sang bisan isa nga nabilin nga awtorisado nga magbaton sang impeachment complaint.
Sa interview naman sang Bombo Radyo kay Defensor, iya ginpahayag nga wala man lang sila ginpasulat sa logbook nga makapakita kuntani nga nakakadto sila sa office.
“That is very, very possible, dahil ang hindi nila pagtanggap, talaga namang may mga batas na naapektuhan diyan,” suno kay Defensor sang ginpamangkot siya kun maga-file sila sang reklamo.
Paathag nila, antes sila nagkadto sa opisina ni Garafil, naantisipar na nila nga indi pagbatunon ang ila nga complaint batok sa presidente, bangud amo man ini ang ginhimo sa complaint sang Bagong Alyansang Makabayan.
“Sabi nila, kahit sino [sa opisina], hindi authorized na mag-receive,” suno kay Defensor. Paathag sang kongresista, wala man nakabutang sa Konstitusyon nga dapat si Secretary Gerafil gid ang mabaton sang impeachment complaint, kundi ang iya lamang nga opisina.
Bangud sang natabo, gindala nanday Defensor ang ila nga mga dokumento. “Immaterial naman kung iiwan mo doon [ang document] na hindi naman officially nagkaroon ng formal na acceptance. Eh baka ibasura nila, eh sayang naman… At baka makikita pa nila ang mismong kaso na ifa-file namin.”
Pahayag sini, ma-istorya pa sila sang iya grupo kun i-file nila liwat ang reklamo — kag kun san-o ini himuon.
Sa bahin sang reklamo sang Makabayan bloc, ginbilin nila ang ila nga mga dokumento sa opisina ni Garafil. Ila gina-insister nga trabaho sang secretary general nga i-transmit ang impeachment complaint kay House Speaker Faustino “Bojie” Dy III sa Lunes kun mag-resume ang session.
Matandaan nga ang isa lang ang madinalag-on nga naka-file sang impeachment complaint batok kay Marcos nga amo si Atty. Andre de Jesus. Ginbaton ni Garafil ang verified kag duly-endorsed complaint sang Lunes, Enero 19, kag ginpasaka na sa Speaker’s office.#
