Gin-ako ni Interior and Local Government Secretary Jonvic Remulla nga masakit para sa iya nga makit-an sa presuhan ang iya abyan nga si former Senator Bong Revilla.
Kasunod ini sang pagbutang kay Revilla sa Quezon City Jail bangud sa indi mapyansahan nga kaso nga malversation nga naangot sa ginaalegar nga ghost flood control project sa Bulacan.
Suno kay Remulla, apisar pa sang ila nga pag-abyanay, mas pasulabihon gihapon sini ang iya trabaho para sa interes sang pungsod.
“Sabi ko naman, this is my last gesture of friendship to you. Dadalhin ka dito habang hindi ka pa arraigned. Pag-serve ng warrant, nag-surrender siya, sabi ko ako na maghahatid sayo, as far as it goes, ‘yun na ‘yung huling pag-uusap namin,” suno sa tiglikom.
“It pains me to see a friend go to jail. But my commitment to country goes beyond the friendship in this country. Uunahin ko muna ang bansa kahit ano mangyari,” dugang pa sini.
Ginpaanggid man niya ini sa iya nga relasyon kay former House Speaker kag subong Leyte Rep. Martin Romualdez. Na-implicate man si Romualdez sa flood control corruption, apang wala pa ini opisyal nga napasakaan sang kaso kaangot sa amo nga eskandalo.
“Pareho na rin yan kay Speaker Martin Romaldez. He was very close to me in college, fraternity brothers kami. Pero uunahin natin lagi ang bansa,” suno kay Remulla. Updanay sila anay ni Romualdez sa Upsilon Sigma Phi sa University of the Philippines.
Kahapon, Enero 22, sang gin-release man sang DILG ang mga laragway ni Revilla kag sang anum ka iban pa nga akusado, apang naka-blur ang ila nga mga itsura antes ini ginpadala sa media.
“Ang dami sa inyo nagre-request, sabi ko sige ilabas ko na kasi wala naman akong balak na itago ‘yan. Ang bilis lang talaga ng pangyayari,” pahayag sini.
Nahibaluan nga nagapaidalom pa sanday Revilla sa isa ka semana nga quarantine agud masigurado nga wala ini sang makalalaton nga balatian antes ini isimpon sa iban nga persons deprived of liberty (PDL) sa selda.
Una na nga ginpasiguro sang DILG kag BJMP nga wala sila sang ihatag nga special ukon VIP treatment kay Revilla apisar nga mataas ang posisyon sini sang una.#
