Natalana subong nga adlaw, Pebrero 2, ang sashing ceremony sang Miss Iloilo 2026.
Maga-umpisa ini alas-kuatro sa hapon sa SM City Iloilo Northpoint.
Sa sini nga seremonya mahibaluan kun sa diin nga national pageant ipadala si Miss Iloilo 2026 Zestah Shalom Espinosa kag ang Heartfelt Queens.
Matandaan nga sa ginhiwat nga koronasyon sang Miss Iloilo sa West Visayas State University (WVSU) Cultural Center sang Enero 17, nangibabaw si Espinosa nga nagtiglawas sang Anilao.
Naga-edad ini sang 21-anyos kag isa ka architecture student sa University of San Agustin. Nagkadto man sa iya ang awards nga Best in Gown, Best in Swimsuit, kag Best in Introduction Video.
Ginkilala naman nga Heartfelt Queens ang nabilin sa Top 5 finalists nga amo sanday Patricia Lynn Beerda sang La Paz, Lorraine Manguiat sang Tubungan, Angel Ann Teruel sang Pototan, kag Jessica Mae Gatungay sang Guimbal.
Una na nga ginpahayag ni Espinosa nga himuon nila ang tanan nga masarangan agud nga itib-ong ang Iloilo pananglitan nga mag-compete na sila sa national stage. Pahayag sini, madamo pa sila sang mga pasabog agud nga ma-represent sang maayo ang syudad.
