Hugot nga ginpanginwala ni anay senator kag Villar group chairman Manny Villar ang mga akusasyon batok sa ila pamilya.
Base sa statement nga ginpagua ni Villar, iya ginpahayag nga bilang tanda sang ila pagka-inosente, nagkooperar gid ang mga ini sa imbestigayson sang Securities and Exchange Commission (SEC).
Dugang pa sini nga nangin transparent man ang mga ila pamilya sa ila financial status.
Ginbalikan man ni Villar ang mga tinion nga nagabulig ini sa iya iloy sa pagbaligya sa merkado, bilang tanda sang iya mainubuson nga pagsugod sa kabuhi padulong sa kadalag-an.
Sa karun suno kay Villar, handa ang mga ini nga magkooperar sa imbestigasyon agud nga mapamatud-an nga wala sang sala ang iya pamilya batok sa mga alegasyon nga gina-haboy sa ila.
Matandaan nga nagpasaka sang kaso-kriminal ang SEC batok sa Villar Land Holdings Corp. kag pila ka miembro sang Villar family bangud sa alegasyon nga market manipulation, insider trading, kag misleading disclosures.
Ginhingadlan nga respondents sa kaso nga gin-file sa Department of Justice si Manny Villar, ang asawa sini nga si former senator Cynthia Villar, amo ang ila mga anak nga sanday Senator Camille Villar, Senator Mark Villar, kag Manuel Paolo Villar, upod man ang iban nga directors kag independent directors nga sanday Cynthia J. Javarez, Ana Marie Pagsibigan, kag Garth Castañeda.
