Mangin magal-umon gihapon ang panahon kag ma-eksperyensyahan ang pag-ulan-ulan subong nga Lunes, Pebrero 9, sa madamo nga parte sang pungsod partikular sa Luzon kag Visayas bangud sa epekto sang shear line.
Suno sa state weather bureau, magadala ini sang lapta-lapta nga pag-ulan kag isolated thunderstorms sa Western Visayas, Eastern Visayas, Catanduanes, Albay, Sorsogon, kag Masbate.
Nagpaandam man ang ahensya sang posible nga flash floods ukon landslides sa sini nga areas.
Sa Heavy Rainfall Warning No. 3 sang ahensya alas singko kaina sang kaagahon, may YELLOW WARNING nga ginpasaka para sa pila ka mga banwa sa probinsya sang Iloilo lakip na sa Calinog, Dueñas, Badiangan, Passi City, Bingawan, Janiuay, Maasin, kag Lambunao.
Buot silingon sini, posible ang pagbaha sa manubo nga mga lugar kag pagtiphag sang duta sa mataas naman nga areas.
Ma-eksperyensyahan naman ang pag-ulan sa masunod nga isa tubtub duha ka oras sa syudad sang Iloilo amo man sa mga banwa sa probinsya sang Iloilo lakip ang San Enrique, Oton, Tigbauan, Guimbal, San Miguel, Pavia, Leganes, Zarraga, Dumangas, Miagao, SanJoaquin, Igbaras, Tubungan, Leon, SantaBarbara, Pototan, Sara, Lemery, SanRafael, Dingle, Anilao, Barotac Nuevo, Mina, New Lucena, Cabatuan, kag Alimodian.
Wala naman sang low pressure area (LPA) nga gina-monitor sa sulod kag gwa sang Philippine Area of Responsibility (PAR).
Una na nga ginpahayag sang PAGASA nga posible nga isa lang ang bagyo sa PAR subong nga Pebrero nga amo ang Basyang nga naglaslas sang nagligad nga semana partikular na sa northern Mindanao.
Samtang, sa separado nga report, ginalauman nga maga-umpisa ang PAGASA sa pagpaguwa sang Daily Heat Index Forecast sa March 1, 2026 kadungan sang pagsugod naman sang tag-ilinit diri sa pungsod.
