Nag-initay ang diskusyon nanday Senator Kiko Pangilinan kag Senate Minority Leader Alan Peter Cayetano sa plenaryo kun sa diin gina-istoryahan ang Senate Resolution No. 256 nga nagakondena sang mga pahayag sang Chinese embassy sa Manila batok sa mga opisyal kag institusyon sang Pilipinas.
Nagsentro ang baisay sang duha ka mga senador sa paggamit ni PCG spokesperson for the West Philippine Sea Commodore Jay Tarriela sang caricature ni Chinese President Xi Jinping kadungan sang isa ka speaking engagement.
Sa amo nga debate, gin-insister ni Cayetano nga nakasala si Tarriela. Delikado ini suno sa iya kun diplomasya ang istoryahan. Ini ang rason suno sa iya nga indi masuportahan sang Senate minority si Tarriela sa amo nga resolusyon ni Pangilinan.
Nagsabat naman si Pangilinan nga wala man gani na-mensyonar ang pangalan ni Tarriela sa resolusyon. Ang ginatumod suno kay Pangilinan amo ang pangkabug-usan nga social media operations sang embahada sang China.
Kun istoryahan naman ang caricature suno kay Pangilinan, amo man gani sini ang ginahimo sang China kaangay sang Chinese state-controlled media outlet nga Xinhua nga masami naga-publish sang caricatures ni President Bongbong Marcos.
Gin-suspend na ang sesyon sang nagpamangkot si Cayetano nga kun amo sini ang panindugan ni Pangilinan, mahimo bala suno sa iya nga maka-post man ang iya staff sang meme nga nagapakita sang itsura sang senador.
ANO GID BALA ANG GINA-KONDENA?
Liwat nga nagtaas ang tensyon sa tunga nanday Cayetano kag Pangilinan sang gina-istoryahan kun ano gid nga statement sang Chinese embassy ang gina-istoryahan nila sa Senate Resolution No. 256.
“Lahat ng sabihin ng Chinese embassador, mali, eh paano kung sabihin niya ‘good morning’, ‘ni hao’? Iku-condemn natin yun? Bawal nang mag-good morning sa Pilipinas?,” pamangkot ni Cayetano.
Ginsabat ini ni Pangilinan nga klaro man ang mga ‘whereas’ sa resolusyon, kag kun mag-research si Cayetano, mahibaluan sini kun ano ang ginatumod. Nag-raise sang point of order si Cayetano, apang nanindugan si Pangilinan nga wala pa ini nakatapos sa paghambal.
Diri na kag gin-suspend ang plenary session.
APRUBADO NGA WALA SANG OBJECTIONS
Sang ulihi, gin-aprubahan kag gin-adoptar sa Senado ang Senate Resolution No. 256.
Ini nga resolusyon ang ginduso sang majority bloc nga ginabug-usan sang sponsor nga si Sen. Francis “Kiko” Pangilinan, Senate President Vicente Sotto III, Senate President Pro Tempore Panfilo Lacson, Majority Leader Juan Miguel Zubiri kag Senators Erwin Tulfo, Risa Hontiveros, Raffy Tulfo, Sherwin Gatchalian, Loren Legarda, JV Ejercito, Bam Aquino, Camille Villar, Mark Villar, kag Lito Lapid, kag mangin si Jinggoy Estrada halin sa minority.
Nagkabos naman ang Senado nga maaprubahan ang proposal nga ideklarar nga persona non grata ang Chinese embassy deputy spokesperson ukon ang bisan sin-o nga Chinese diplomat.#
