Nagdangat na sa 51 ang bangkay nga na-recover sa naglugdang nga MV Trisha Kerstin 3 sa baybayon sang Baluk-Baluk Island, Basilan.
Suno sa Philippine Coast Guard (PCG), nagpadayon ang mga technical divers sa ila underwater search and recovery operations subong nga adlaw, kun sa diin lima (5) ka panibag-o nga bangkay ang ila nakit-an.
Nagsulod ang mga divers sa economy accommodation sa first deck sang barko, kun sa diin nasapwan nila ang isa ka lapsag, isa ka menor de edad, duha ka babaye, kag isa ka lalaki.
Gindala sa Zamboanga City ang mga bangkay agud pagadal-on sa Talabaan Cemetery para sa pagproseso sang mga forensic experts.
Matandaan nga naglugdang ang nasambit nga barko sang Enero 26, 2026 sang kaagahon.
Sa karon, padayon nga nagasinggitan ang pamilya sang mga biktima sang hustisya batuk sa Aleson Shipping Lines Inc., nga nagapanag-iya sang amo nga passenger vessel.
Nagapadayon man ang imbestigasyon sang Department of Transportation (DOTr) nahanungod sa amo nga insidente.
