Suportado sang isa ka travel industry group ang pagrepaso sang Kamara sa pagsulundan sa pagpanukot sang travel tax.
Suno sa Global Tourism Business Association (GTBA), importante ang pag-review bangud makabulig ini nga masiguro nga makabenepisyo gid ang sektor sang turismo kag ang lokal nga komunidad sa travel tax.
Subong, nagalab-ot na ang suktanay sa P2,700 sa first-class passengers kag P1,620 sa economy travelers.
Sang Sabado, matandaan nga nagpanawagan si House tourism committee vice chairman kag Palawan Representative Gil Acosta sang pagpatigayon sang congressional review sa utilization sang travel taxes nga ginasukot sa mga Pinoy nga nagabyahe sa luwas sang pungsod.
Suno sa mamalidha, ini nga travel tax collections ang may average nga P4 billion tubtub sa P5 billion kada tuig.
Nagakadto ini sa Tourism Infrastructure and Enterprise Zone Authority (TIEZA), Commission on Higher Education (CHED), kag sa cultural sector.
Kahapon, Pebrero 10, gin-anunsyo naman sang Malacañang nga lakip sa 21 ka priority legislative measures nga aprubado ni President Ferdinand “Bongbong” Marcos, Jr. ang hagna nga maga-abolish sa travel tax.
Suno kay Palace Press Officer Claire Castro, luyag sang presidente nga mapahagan-hagan ang palas-anon nga pinansyal sang mga byahero, ilabi na nga indi tanan naga-byahe agud maglagaw lamang kundi agud magtrabaho kag bangud may kadtuan nga emerhensya.
May yara sang mga kahangawa nga mabuhinan ang pondo sa edukasyon kag sa promosyon sang turismo kun i-abolish ang travel tax, apang suno kay Castro, iga-cover sang gobyerno ang mangin kakulangan sa pondo paagi sa national budget.#
