Halos P300 gid ang nadula sa kita sang pila ka mga tricycle drivers sa syudad sang Iloilo umpisa sang nagtimbuok ang presyo sang gatong bangud sa epekto sang gyera sa Middle East.
Sa interview sang Bombo Radyo kay Leon Manderico, nagabyahe sang tricycle sa Cuartero, Jaro, Iloilo City, iya ginpahayag nga antes ini nga semana, may limpyo pa siya nga P800 kada adlaw.
Apang subong suno sa iya, P500 kada adlaw na lang ang iya madala pauli.
Sa baylo nga maglibot para nga makapangita sang pasahero, nagapundo na lang sila suno sa iya kag nagahulat sang pasahero agud nga makakinot sa gatong.
Matandaan nga gin-umpisahan sang Martes ang pagpahat-pahat sang pagpatuman sang big-time oil price hike para sa gatong.
Sa gasolina, may pagsaka nga P7 tubtub sa P13 kada litro sa isa ka semana.
Ini na ang ika-siyam nga sunod-sunod nga semana nga pagtaas sa gasolina. May ginalantaw pa gid nga big-time price hike sa masunod nga semana ilabi na nga wala pa nagatahaw ang tension sa Middle East.
