Nagalibog ang ulo sang mga jeepney driver sa Iloilo City kun ano na lang ang ila dal-on pauli nga kuwarta sa ila tagsa ka pamilya ilabi na nga halos ibakal na lang sang krudo ang makit-an nila sa isa ka adlaw nga byahe.
Sa interview sang Bombo Radyo kay Russel Zamora, iya ginpahayag nga P450 pa ang iya ginabayaran sa gina-arkila sini nga traditional jeep.
“Ano na lang ang para sa amon nga pamilya? Amo pa lang natabo ni. First time pa lang ni. Pangabay man namon sa gobyerno nga ila man depensahan ang pagsinaka sang presyo sang krudo. Kaluluoy kami tanan nga nagapangabuhi sa dalanon bilang driver,” suno sa iya.
Sa P850 sini nga limpyo, P500 ang ginatabon sini sa krudo gani P350 na lang gid ang madala sini pauli.
Suno kay Zamora, ginaantisipar na sini nga mas maga-gamay pa gid ang iya limpyo bangud madugangan pa gid sang P14 ang presyo sang kada litro sang krudo sa masunod nga semana.
Tubtub subong suno sa iya, wala pa ini sang nabatian nga may nakabaton na sang ayuda.
2018 sang nag-umpisa siya sa pagbyahe sang jeep diri sa syudad kag ini ang una nga bes suno sa iya nga na-eksperyensya nila ang kapuraot sang byahe nga resulta sang nagatimbuok nga presyo sang gatong.
“Kun gapamati ang tagdumalahan sang gobyerno, tani batyagon man nila kami nga mga driver, kay kaluluoy ang amon pamilya sini,” suno sa driver. “Waay pa kami kabati nga may ayuda diri sa Iloilo nga may nakakuha kay ipaagi pa kuno sa coop.”
Kun basehan ang oil industry estimates, posible nga magdangat na sa P130 ang presyo sang diesel sa masunod nga semana, samtang magalapaw naman sa P100 ang kada litro sang gasolina bangud sang panibag-o nga oil price hike nga resulta sang kinagamo sa Middle East.#
