Nabaton na ni Vice President Sara Duterte ang imbitasyon sang House Committee on Justice nga magtambong sa impeachment hearing sa masunod nga Mierkules, Marso 25.
Suno kay Committee Chair Rep. Gerville Luistro, may ara sang patigayunon nga regular meeting ang panel nga maga-umpisa sang alas 10 sa aga.
Ginpangabay man sang Committee nga magtambong si Duterte sang personal bilang respondent sa impeachment complaints nga gin-file nanday Reverend Father Joel Saballa kag Atty. Nathaniel G. Cabrera kag iban pa.
Mahimo i-coordinate ni Duterte sa secretariat sang Committee ang kumpirmasyon sang iya pagtambong.
Nahibaluan nga duha sa apat ka reklamo ang nagapabilin sa hurisdiksyon sang Committee on Justice, samtang ang isa gin-set aside bangud sa nalapas nga one-year bar rule kag ang isa gin-withdraw sang nag-file sini.
Sa Marso 25, nakatalana ang procedural framework sang impeachment proceedings kag opisyal nga pagbukas sang diskusyon sa mga reklamo batok kay Duterte.
Nahibaluan nga ang mga alegasyon sa impeachment complaints batok kay Duterte nagalakip sang betrayal of public trust, pagpanuhol sini, graft and corruption, lakip na ang ginaalegar nga misuse sang P612 milyon nga confidential funds.
