Ginsigurado sang Pinoy boxer nga si Pedro Taduran nga mapanas sini ang yuhom sa nawong sang Mexican boxer nga si “Smiley” Gustavo Perez Alvarez sa ila pag-atubangay.
Wala siya nagsala.
Sa ila sambuwa sa Pechanga Resort and Casino sa Temecula, California, gintumba sang tumandok sang Libon, Albay ang 27-anyos nga boksidor sa ika-pito nga round kag dalayon nga nadepensahan ang iya International Boxing Federation minimumweight title.
Nakatindog pa ang challenger antes ang count of 10, apang ginpa-untat na sang referee nga si Thomas Taylor ang hampang bangud ini na ang ikaapat nga tumba ni Perez Alvarez.
Nagsaka na ang professional boxing record ni Taduran sa 20-4-1 (win-loss-draw) nga may 14 knockouts, samtang nag-us-os naman si Perez Alvarez sa 16-2.
Naka-base na subong si Taduran sa Southern California. Antes pa man ang sambuwa subong nga adlaw, nagpabutyag na siya sang daku nga interes sa unification fight kay WBO/WBA champion Oscar Collazo.
Photo: Boxing Scene
