Nakatalana na nga mag-abot subong nga adlaw, alas otso sang aga oras sa Pilipinas, ang Artemis II mission sang National Aeronautics and Space Administration (NASA) nga may yara sang 10-day mission nga paglibot sa bulan.
Ginapaabot sang National Aeronautics and Space Administration (NASA) ang isa ka safe nga splashdown sang spacecraft sa dagat malapit sa California.
Matapos ang masobra siyam ka adlaw sa kahawaan maga-separar ang Orion crew module nga ginahamtangan sang mga astronaut halin sa service module antes ini makasulod sa atmosphere sang Earth.
Ang service module dalayon nga masunog samtang ang crew capsule naman magabalik nga luwas.
Sa pagsulod liwat sa atmosphere, maka-eksperyensya ang mga astronaut sang tuman ka init kag pwersa nga halos apat ka beses sang normal nga gravity.
May yara man sang temporaryo nga pagkadula sang komunikasyon sa sulod sang mga anum ka minuto bangod sa plasma nga nagapalibot sa salakyan.
Magabukas ang mga parachute agud amat-amat nga pahinayon ang capsule antes ini mahulog sa dagat.
Gilayon naman nga magaresponde ang U.S. Navy agud pangitaon ang mga astronaut, kag pagadal-on sila sa medical bay sa sulod sang duha ka oras pagkatapos sang landing.
Hugot nga ginamonitor sang NASA ang reentry bangod sa nagligad nga isyu sa heat shield sang Artemis I mission.
Bangod sini, ginbag-o ang pamaagi sang pagbalik sang spacecraft agud mapahagan-hagan ang tuman nga kainiton.
Apisar may na-record nga gamay nga tagas sang helium sa propulsion system, suno sa mga opisyal nga wala ini nagakaapekto sa kabug-usan nga dalagan sang misyon.
Suno sa NASA, may kumpiyansa sila sa safe nga sistema, kag ang madinalag-on nga pagbalik sang Artemis II isa ka importante nga tikang para sa masunod pa nga mga misyon pakadto sa bulan.
