Nagpaandam si US President Donald Trump nga dugangan ang taripa sa mga produkto sang China nga pasulod sa Estados Unidos sang Amerika kun maghatag ang Beijing sang military assistance sa Iran sa gyera sa Middle East.
Suno kay Trump, daku gid ang mangin problema sang China pananglitan nga himuon nila ini.
“If we catch them doing that, they get a 50 percent tariff, which is a staggering — that’s a staggering amount,” suno pa sa US leader.
Wala ginpatpat sang presidente kun ano pa gid ang himuon sang Estados Unidos.
Ang pahayag ni Trump ang kasunod sang intelligence reports nga nagapreparar ang China sa pagpadala sang mga hinganiban sa Tehran.
Base sa intel reports, nagaplano ang Beijing sa pagpadala sang advanced air defense systems sa masunod nga mga sinemana.
Lakip diri ang anti-air missiles ukon ang MANPADS nga makadala sang katalagman sa mga aircraft nga manubo lang ang lupad kangay sang US military platforms.
Nabutang man sa reports nga posible nga ipaagi sa third countries ang kasugtanan agud nga indi mahibaluan sang US kun sin-o ang pamuno sini.
Antes sini, nauna na nga ginpanginwala sang China Defence Ministry ang paghatag sa Iran sang satellite imagery kag semiconductor chip nga naga-manufacture sang equipment para sa Iranian military.
Nahibaluan nga sa masunod nga bulan, natalana nga magbisita si Trump sa China kag makigkita kay Chinese leader Xi Jinping.
