Patay ang driver sang motorsiklo matapos nga nabungguan sini ang wing van nga nagapundo sa highway kag pasulod na kuntani sa planta sang isa ka beverage company sa Barangay Ungka II, Pavia, Iloilo.
Ang biktima ang residente sang Barangay Pungtod, Cabatuan.
Sa interview sang Bombo Radyo kay Police Lieutenant Gary Tayongtong, deputy chief sang Pavia Municipal Police Station, iya ginpahayag nga halin sa Iloilo City kag papauli na kuntani ang biktima sang natabo ang insidente.
Gindeklarar nga patay ang biktima bangud sa samad sa iya ulo bisan pa nga may suksok ini nga helmet. Ginpahayag sang pulis nga naglampos ang ulo sini sa truck bangud madasig ang dalagan sang motor.
Pahayag pa sang pulis, nakainom sang makahulubog nga ilimnon ang biktima.
Natabuan man suno sa iya nga nagahulat ang wing van sang turno sini nga makasulod sa planta.
Nag-istoryahanay na ang magtimbang nga kampo.
Sa inisyal nga impormasyon halin sa Pavia Police, magabulig ang driver sang wing van sa pagpalubong sa driver sang motor.#
