Content Warning: This material discusses alleged sexual violence, including rape, which may be distressing for some readers.
Gintugyan sa Balay Dalayunan sa Bo. Obrero, Lapuz, Iloilo City ang apat ka mga menor de edad bangud sang ginaalegar nga paghimulos sa kaangay man nila nga menor de edad sa distrito sang Molo.
Natabo ang ginapahayag nga insidente sang Martes sang gab-i, Abril 14.
Ang biktima amo si alias Nene.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga sang amo nga adlaw, nag-updanay si alias Nene kag ang isa ka menor de edad sa punong.
Sang didto na sila, ginpahayag nga nag-abot ang tatlo ka iban pa nga menor de edad nga ka-barkada sang upod ni alias Nene kag didto na natabo ang ginaalegar nga pagpanghimulos.
Suno kay Inot, nagpanugid ang bata nga babaye sa barangay official, kag ang opisyal naman ang nag-report sa pulis.
Nadakpan ang mga kabataan sa ila man mga balay kag nag-atubangay sila sa barangay.
Pahayag ni Inot, wala man naka-inom ang kabataan sang natabo ang ginaalegar nga pagpanghimulos.
Napaidalom na ang bata nga babaye sa medical examination kun sa diin nakitaan sang semilya sang lalaki ang kinatawo sini.
Dugang sang hepe, nagapadayon pa subong ang inquest proceeding.
Ginpaathag sini nga mahimo na gid ma-file ang panumbungon samtang yara ang mga menor de edad sa Balay Dalayunan, kag pananglitan may desisyon na halin sa korte batok sa ila kag legal na ang ila edad, mahimo na nga iga-saylo sila sa pasilidad sang Bureau of Jail Management and Penology.#
