Nagpagwa na sang show cause order nga Land Transportation Office (LTO) batok sa isa ka former mayor nga amo ang driver sang salakyan nga wala nagbayad sa iya ginpatughong nga gas kag nagpalagas pa sa gasoline attendant bisan nga nagatagiti ang init.
Ginmanduan man ang driver nga i-surrender ang iya nga lisensya nga subong napaidalom na sa 90 ka adlaw nga preventive suspension.
Matandaan nga gin-ulan sang pagpakamalaot ang amo nga insidente matapos nakit-an sa video nga kuha mismo halin sa salakyan sang driver.
Mabatian sa video nga nagakinadlaw pa ini samtang nga nagalinagas naman ang gasoline station attendant.
Natabo ang insidente sa Allacapan, Cagayan.
Ang LTO mismo ang nagkumpirma nga isa ka anay alkalde ang driver samtang myembro naman sang Indigenous People ang gasoline attendant.
Suno kay LTO chief Asec. Markus Lacanilao, indi gid maayo ang ginhimo sang former mayor nga daw kaangay nga ginhimo nga halampangan ang gasoline attendant bisan tuman ka init ang tyempo.
Sandig sa report, ang former mayor ang nagapanag-iya sang gas station kag empleyado sini ang nagalagas nga gasoline boy.
Apang pahayag ni Lacanilao, indi dapat paghimuon nga content ukon kaladlawan ang bagay nga nagabutang sa isigkatawo sa katalagman. Gintawag sini nga iresponsable kag wala sang kabalaka sa isigkatawo ang amo nga sitwasyon ilabi pa nga nabatyagan sang tanan subong ang mataas nga presyo sang langis.
“Hindi katanggap-tanggap na gawing biro o content ang isang sitwasyong malinaw na naglalagay sa kapwa sa panganib. Lalo na sa panahong nararanasan natin ang epekto ng pagtaas ng presyo ng langis, ang ganitong uri ng asal ay hindi lamang iresponsable, kundi nagpapakita rin ng kawalan ng malasakit,” suno kay Asec. Lacanilao.
Nahibaluan nga kun may show cause order, dapat nga magpaathag ang subject kun ngaa indi sila dapat pagsilutan kag kun ngaa indi sila pag-ideklarar nga improper person nga magdala sang salakyan.
“Hindi ito nakakatuwa, at lalong hindi ito dapat tularan. Ang paggamit ng sasakyan ay may kaakibat na pananagutan, at pananagutan ding gamitin ito nang may paggalang sa kapwa at sa batas,” dugang sang LTO official.#
