Nagpaandam si US President Donald Trump nga magatakop na ang ila ceasefire sa Iran sa Myerkules sang gab-i oras sa Washington.
Suno kay Trump, mataas ang posibilidad nga indi na sini pagpalawigon ang ceasefire ilabi na kun wala man sila sang kasugtanan nga malab-ot.
Posible man suno kay Trump nga magbalik gilayon ang inaway kun mapaslawan gihapon ang US kag Iran nga makahimo sang kasugtanan.
Matandaan nga pila ka beses nga nagalain-lain ang sabat sang president kun palawigon sini ang ceasefire sa Middle East.
Sa pag-atubang sini sa reporters sang nagligad nga semana, lima ka separado nga beses siya nga ginpamangkot kun i-extend sini ang ceasefire, kag tatlo ka lain-lain nga sabat ang iya ginhatag.
Ginapaabot man nga magabalik liwat sanday Vice President JD Vance kag mataas nga US officials sa Islamabad, Pakistan para sa ikaduha nga hugnat sang negosasyon sa Iran.
Kun basehan naman ang Iran Foreign Ministry, ila gin-alegar nga wala sang plano sang pag-istoryahanay subong.
