Ginpaangid sang isa ka Bombo Abogado ang mahimo mangin kapalaran ni Vice President Sara Duterte sa natabo kanday anay Chief Justice Renato Corona kag former President Joseph Estrada nga pareho nga na-impeach.
Sa interview sang Bombo Radyo kay Atty. Noel Palomado, former auditor sang Commission on Audit, iya ginpahayag nga kun basehan kun paano na-impeach sanday Corona kag Estrada, dako ang nangin papel sang ila nga Statement of Assets, Liabilities, and Net Worth (SALN).
Si Estrada ang nag-atubang sadto sa mga akusasyon kaangot sa “Jose Velarde” account kag mga hidden mansions.
Samtang ang trial ni Corona naman ang nagsentro sa iya nga kapaslawan nga i- disclose ang millions sa dollar kag peso bank accounts sa SALN sini.
Suno kay Atty. Palomado, sa natabo nga impeachment hearing sang nagligad nga semana, nadiskubre ang mga dalagko nga discrepancies sa tunga sang SALN ni VP Sara kag sa bank transaction records sang Anti-Money Laundering Council (AMLC).
Natukiban nga sa end of 2024, nagdeklarar ang Vice President sang net worth nga ₱88.51 million apang sa AMLC reports, naglab-ot sa ₱6.77 billion nga total transaction flows (inflows kag outflows) ang naangot kay VP Sara kag bana nga si Atty. Manases Carpio, sa tunga sang tuig 2006 kag 2025.
Suno kay Palomado, kun may misdeclaration sang asset, mahimo nga magpanumdom ang publiko nga ini ang ill-gotten wealth.
Gin-athag naman ni Palomado nga bank transaction lang ang ginpakita sang AMLC.
Suno diri, indi man basta-basta mapagwa ang bank statements bangud mahimo nga maglapas ini sa Bank Secrecy Law.
Sa pihak sini, nagapati si Palomado nga yara na ini sa diskarte sang House Justice Panel kag posible nga kun makapangita sang probable cause batok kay VP Sara kad madayon ang trial, sa Senado mahimo nga ipagwa ang nasambit nga mga bank records.
