Nagtaliwan ang tatlo ka tawo kag tatlo naman ka iban pa ang padayon nga ginabulong subong bangud sang ginasuspetsahan nga outbreak sang hantavirus sa sulod sang cruise ship nga nagalayag sa Atlantic Ocean.
Sandig ini mismo sa gin-report sang World Health Organization (WHO).
Ginkumpirma man sang Oceanwide Expeditions nga amo ang naga-operate sang MV Hondius nga lunsay cruise passengers ang tatlo nga nagtaliwan.
Naka-angkorahe ang barko subong sa Praia, ang capital sang Cape Verde nga isa ka island nation sa west coast sang Africa.
149 pa ka mga pasahero ang nagapabilin sa sulod sang barko kag indi pagtugutan nga makapanaog sa amo nga lugar.
Nagbisita naman ang local health authorities kag gin-assess ang kondisyon sang duha ka crew members nga symptomatic ukon nagapakita sang sintomas kag nagakinahanglan sang insigida nga medical care.
Ang hantavirus mahimo mag-resulta sa severe kag makamamatay nga respiratory illness nga ginatawag nga hantavirus pulmonary syndrome. Naga-umpisa ini sa hilanat, pagkudog, pagpalanakit sang kaunuran, kag pagsakit sang ulo.
Mahimo ma-infect ang tawo paagi sa contact sa rodents kaangay sa ilaga ilabi na ang ila ihi, higko kag laway, suno sa Centers for Disease Control and Prevention (CDC).
May isa ka sahi sang hantavirus nga ginatawag nga Andes virus kun sa diin possible ang paglaton halin sa isa ka tawo pakadto sa isa pa ka tawo, apang rare ini ukon malaka lamang.
May kaangay sini nga kaso sa Chile kag sa Argentina kun sa diin naghalin ang barko.
Ginklaro naman sang WHO nga indi isa ka public health threat ang amo nga outbreak kag indi kinahanglan nga mag-panic ukon magpatuman sang pagpanghugot sa byahe sang publiko.#
