Nagpakigkita si United States Secretary of State Marco Rubio kay Pope Leo XIV sa Vatican kasunod sang asud-asud nga mga pagpang-atake ni President Donald Trump sa Santo Papa.
Ini nga closed-door meeting amo ang una nga pag-atubangay kag pag-istoryahanay sang lider sang Catholic Church kag isa ka opisyal sang Gabinete ni Trump sa sulod sang halos isa ka tuig.
Masobra duha ka oras ang diskusyon sang duha nga nagalakip sang sitwasyon sa Middle East.
Suno kay Rubio nga isa man ka practicing Catholic, sila kag ang Vatican ang may yara sang magkaangay nga commitment sa pagpaluntad sang kalinong kag pagtib-ong sang dignidad sang katawhan.
Sa pihak nga bahin, nagsiling ang Vatican sa may pag-istoryahanay kaangot sa regional kag international situations. Suno sa Vatican, ginpalig-on liwat ang “shared commitment” sa pagpaayo pa sang bilateral relations.
Matandaan nga antes sini, nangin kontrobersyal ang mga statement ni Trump batok kay Pope Leo XIV nga isa ka kritiko sang gyera batok sa Iran.
Gintawag pa anay ni Trump ang Santo Papa nga “weak on crime” kag “terrible for foreign policy”. Nagsiling man ini anay nga indi man siya fan sang Pope, kag indi niya luyag ang Santo Papa nga sa iya paminsaron naga-ugyon nga makaangkon ang Iran sang nuclear weapon.
Nakasabat man anay ang Pope nga indi siya interesado nga makig-debate kay Trump kag wala siya sang kahadlok sa iya nga administrasyon samtang nga padayon siya nga nagaapelar para sa kalinong.
