‘Humarap siya! Bakit niya ginugulo ang mundo?’ —Ombudsman Remulla kay Bato dela Rosa

Indi makahangop si Ombudsman Boying Remulla kun ano nga klase sang tawo si Senador Ronald “Bato” Dela Rosa bangud sang pagpinalagyo sini kasunod sang arrest warrant halin sa International Criminal Court (ICC).

“Naging chief PNP siya, tumatakbo siya sa batas. Humarap siya… Anong klaseng tao ‘yan? Ganiyan ba ang dapat maging senador natin, tumatakbo sa batas?,” suno kay Remulla sa press briefing subong nga hapon.

Matandaan nga si Ombudsman Remulla ang una nga nagsapubliko sadto pa nga Nobyembre 2025 nga may arrest warrant na ang ICC kay Dela Rosa, apang sang amo nga tion, ginsiling sini nga digital copy pa lamang ang iya gina-uyatan.

Nagasibo ang pahayag ni Remulla sa kumpirmasyon sang ICC nga sang Nobyembre 6, 2025 pa gin-isyu sang Pre-Trial Chamber I ang arrest warrant apang sikreto pa lamang, kag subong lamang nga semana gin-unseal ukon ginpakita sa publiko nga kadungan man sang pagbalik ni Dela Rosa sa sesyon sang Senado.

Sang Lunes sang hapon, literal nga nagadalagan kag nagkalasandad pa ang former PNP Chief sang gintuyo siya nga dakpon sang NBI agents.

Ginhatagan siya sang protective custody sang Senado, may lukpanay kag ginamo nga natabo sang Myerkules sang gab-i, tubtub nga nakumpirma nga nakapalagyo liwat si Dela Rosa sang Huwebes sang kaagahon.