Bato, posible makaboto sa promulgasyon sang impeachment trial vs VP Sara

Mahimo nga tugutan gihapon si Senator Ronald “Bato” dela Rosa nga makaboto sa adlaw sang promulgasyon agud i-convict ukon i-acquit si Vice President Sara Duterte angot sa iya impeachment trial.

Sa interview sang Bombo Radyo kay Atty. Nestor Jeremy Moreno, Law Professor sa College of Law sa University of San Agustin, iya ginpahayag bisan indi pisikal nga makatambong sa plenary session sang Senado, makaboto ini kun aprubahan sang mayorya sang mga senador ang isa ka mosyon nga magapahanugot sang absentee voting sa idalom sang ginkasugtan nga mga patakaran sang impeachment court.

Sa idalom sang ginapatuman nga parliamentary practice sa Senado, ang pagboto sang isa ka miyembro ang naandan nga nagakinahanglan sang aktuwal nga presensya sa sesyon.

Apang suno kay Moreno, mahimo gid ini bag-uhon sang mga senador paagi sa pag-amyendar sa rules of court.

Nahibaluan nga 2/3 ukon 16 gikan sa kabilugan nga 24 ka senador ang kinahanglan nga magboto pabor sa pag-convict kay Duterte agud makakas ini sa posisyon kag permanente nga ma-disqualify sa pag-uyat sang ano man nga public office.

Samtang, siyam naman ka boto ang kinahanglan agud i-acquit ang bise presidente.