Nagpabati-bati si Senator Robin Padilla sa mga madugay na nga nagaserbisyo bilang senador sang Pilipinas.
Sa iya social media post, iya ginpahayag nga madamo sa mga senador ang manug-apat na ka termino sa pwesto, apang wala gid ang mga ini nakabulig sang insakto sa mga imol kag mamumugon paagi sa maayo nga mga programa.
Suno sa iya, madamo sa gihapon ang nagapabilin nga nabudlayan sa estado sang ila kabuhi ilabi na ang mga mangunguma, manugpangisda, kag iban pa nga sektor.
Nagapati man ang senador nga mas naga-imol pa ang mga imol kag nagamanggaranon naman ang mga manggaranon samtang nagadugay.
Lakip man sa ginpakigbahin sang senador amo ang iya pagpanghangkat sa mga mamalidha nga unahun nga iduso kag ipasar ang mga programa para sa mga ordinaryo nga mga Pilipino kaangay sang pagpasaka sang sweldo, mas barato nga mga balaydan kaangay sang tubig kag kuryente, kag iban pa nga mga nagapanguna nga mga kinahanglanon.
Si Padilla nga myembro sang majority bloc ang sentro man subong sang kontrobersiya nahanungod sa natabo sa senado kun sa diin siya ang ginatudlo nga nagpapalagyo kay Senator Bato Dela Rosa sang Mayo 14, pagduso sang mayorya sang online voting para sa mga senador nga indi makapadulong sa senado, kag amo man ang pag-ilis sang liderato.
