Gintawag ni Senador Erwin Tulfo nga daku nga kabutigan ang mga alegasyon nga nagbaton siya sang mga maleta nga puno sang kuwarta halin kay anay Ako Bicol Party-List Rep. Zaldy Co.
Ini matapos nga isa siya sa mga ginpangalanan sang isa sa mga nagpakilala nga anay miyembro sang Philippine Marines sa hearing sang Senate Blue Ribbon Committee.
Ginlaragway man sang senador nga “bogus” ang amo nga hearing kahapon, Hunyo 4, nga ginpangunahan sang kampo ni Senate President Alan Peter Cayetano.
Suno kay Tulfo, wala nagasanto ang mga pahayag ni Bernard Gumban, isa sa mga nagpakilala nga 18 “ex-marines”.
“Sa sobrang daming kasinungalingan, siya mismo ay litong-lito,” suno kay Tulfo.
Gintumod pa sang senador ang paglain-lain sa sugilanon sang testigo, lakip na ang kadamuon sang mga maleta nga gindala kag ang kantidad sang kuwarta nga ginasiling nga yara sa sulod sini.
Ginpahayag sang senador nga may mga personalidad nga na-mensyonar sa orihinal sini nga affidavit apang wala na nagguwa sa ila testimonya kahapon.
“Ito ba ang sinasabi nilang impartial investigation? Kapag kaalyado ligtas ka, kapag tagapagtuligsa, delikado ka?” dugang niya.
Nagsiling man si Tulfo nga nakita niya ang isyu bilang isa ka planado nga propaganda agud gub-on ang iya pangalan kag reputasyon.
“Hindi na ito isang simpleng imbestigasyon, ito ay isang malinaw at planadong propaganda laban sa aking pagkatao at reputasyon,” pahayag pa sini.
Ang amo nga hearing ginpatigayon sa idalom sang grupo nga ginapamunuan ni Cayetano, samtang ang kampo nanday Tulfo kag Senate President Pro-Tempore Sherwin Gatchalian may separado man nga hearing sang Senate Blue Ribbon Committee sa tunga sang nagapadayon nga tensyon sa liderato sang Senado.
Mas una nga gin-anunsyo ni Tulfo nga i-schedule niya sa Hunyo 8 ang masunod nga hearing sang komite nga iya ginapamunuan. Apang, nagpadayon gihapon ang hearing sang kampo ni Cayetano matapos nagluntad ang tensyon kag komprontasyon sa Senado nga ginalakipan nanday Interior Secretary Jonvic Remulla, Senadora Pia Cayetano, kag Senador Robin Padilla.
Sa hearing sang kampo ni Tulfo, imbitado man ang “ex-marines.”#
