Gin-suspend sa iya trabaho ang chief prosecutor sang International Criminal Court (ICC) nga si Karim Khan samtang nga nagapadayon ang imbestigasyon sa iya kaso.
Ini nga desisyon ang gin-himo sang management oversight body sang ICC nga naka-base sa The Hague, Netherlands.
Gintugyan man ang isyu sa 125 member states sang korte. Maga-convene ang states sa isa ka special session kag didto botohan kun ano na ang himuon kay Khan.
Una na nga ginpanginwala sang amo nga British lawyer ang alegasyon sang nonconsensual sexual contact batok sa female aide sa iya nga opisina samtang nga yara sila sa ila nga balay kag may misyon.
Duha ka tuig na nga nagtuhaw ini nga eskandalo.
Sang Mayo, matandaan nga nagpanaog anay sa pwesto si Khan samtang nga naga-imbestigar sa iya ang United Nations. Siya ang una nga ICC prosecutor nga pormal nga ginsuspinde sang oversight body sa iya katungdanan.
Kilala si Khan sa Pilipinas bangud siya ang Chief Prosecutor sang ICC nga nanguna sa inquiry sa war on drugs ni former President Rodrigo Duterte tubtub nga nakasuhan ini sang crimes against humanity kag nadala sa The Hague.
Napasaka na ang kaso ni Duterte sa full-blown trial matapos ginkumpirma sang Pre-Trial Chamber I ang charges batok sa iya.#
