Nahaw-asan si Iloilo City Mayor Raisa Treñas matapos nakumpirma sang awtoridad nga negatibo ang bomb threat nga ginpadala sa Iloilo City Hall kag sa Iloilo Provincial Capitol.
Nag-abot ang bomb threat kaina sang hapon.
Sa mensahe sang nagpamahog, ginmensyonar sini ang Iloilo City Government kag ang isa ka kongresista sa probinsya sang Iloilo.
Gin-alegar sang sender nga magatanum siya sang lima ka bomba bwas, Hunyo 15, sa City Hall kag sa Provincial Capitol. Nagdugang pa ini sa iya mensahe nga pakadtuon man didto ang gobernador kag ang mayor sang Iloilo City “para mamatay na kayo.”
Didto subong sa Singapore si Mayor Treñas para magtambong sa Mayors Forum kadungan sang 10th World Cities Summit.
“I am relieved to know that the bomb threat directed against Iloilo City Hall and the Iloilo Provincial Capitol has been declared negative following the immediate assessment and inspection conducted by law enforcement authorities,” suno sa official statement sang alcalde.
Gindayaw man sini ang Iloilo City Police Office (ICPO), City Explosives and Canine Unit, kag tanan nga concerned agencies sa madasig nga pag-responde agud nga mabantayan ang seguridad sang publiko.
Ginpasalig sang alkalde nga bisan yara siya sa luwas sang pungsod, magapadayon siya sa pag-monitor sa mga nagakatabo sa syudad.
Pahayag pa sini, nagalaum siya nga ma-identify na gilayon sang ICPO kag Regional Anti-Cybercrime Unit (RACU) ang indibidwal nga responsable sa sini nga “malicious online post” kag mapasaka na ang kaso-kriminal batok sa mga indibidwal nga involved.
Ginpahanumdom man sang alkalde sa publiko nga mangin responsable sa ila paggamit sang social media.
“Threats of this nature are serious offenses that create unnecessary fear, disrupt government operations, and endanger public safety. I remind everyone to use social media responsibly,” dugang ni Mayor Treñas.
Una na nga ginpahayag sang Iloilo City Police Station 1 nga bisan na-clear na ang Capitol kag ang City Hall, pataason ang seguridad bwas kag dugangan ang i-deploy nga mga personnel kasunod sang nabaton nga pamahog.#
