Gina-usisa na sang Department of Justice (DOJ) ang posible nga pagpasaka sang kaso batok sa mga opisyal sang gobyerno nga may ara sang koneksyon sa shooting incident sa Senado sang Mayo 13.
Dala man sa gina-imbestigaran sang ahensya ang pagpalagyo ni Senador Ronald “Bato” dela Rosa halin sa protective custody sang Senado kaagahon sang Mayo 14.
Suno kay Justice Secretary Fredderick Vida, nakabaton ang panel prosecutors sang pahayag halin sa mga miyembro sang National Bureau of Investigation (NBI), media practitioners, kag CCTV footage nga nagapakita nga may mga sniper shot nga ginpalupok halin sa ikalima nga panalgan sang Senado pakadto sa isa ka identifiable NBI vehicle nga nakaparada malapit sa GSIS building.
Base sa mga inisyal nga imbestigasyon, madamo sa mga personalidad nga nalakip amo ang mga opisyal sang gobyerno.
Ginapasiguro man ni Vida sa publiko nga ila paga-uyatan ini nga kaso nga propesyonal kag wala sang may ginapaboran.
Dugang pa sang tiglikom nga wala sing bisan sin-o nga labaw sa kasuguan, apang importante man nga wala sing bisan sin-o nga mapasakaan sang kaso kun wala sang nagkaigo nga ebidensya.
