Nagbalik na sa Manila si President Ferdinand Marcos Jr. matapos ang duha ka adlaw nga working visit sa Kazan, Russia nga iya ginlaragway nga “mabinungahon gid.”
Sa iya pagbisita sa amo nga pungsod, ginpangunahan sini upod kay Russian President Vladimir Putin ang pagselebrar sa ika-35 nga ASEAN-Russia Commemorative Summit.
Ila man naistoryahan ang mga isyu sa rehiyon kag nagakatabo sa kalibutan, lakip na ang South China Sea, sitwasyon sa Middle East, seguridad, terorismo, cybercrime, kag iban pa.
Ginpabaskog man sang mga ini pila ka mga plano nga magapadalom pa sang ila nga kooperasyon sa politika, ekonomiya, kultura, enerhiya, kag iban pa nga sektor.
Nagpatigayon man sang labing una nga bilateral meeting si Marcos kag Putin, kun sa diin ila gin-istoryahan sang pagpabakod sang ila relasyon kag pagbinuligay sang Pilipinas kag Russia.
Apisar wala pa sang pinal nga kasugtanan sa enerhiya, ginpahayag sang Presidente nga bukas ang Russia sa pagpabaskog sang ila kooperasyon ilabi na sa suplay sang mga produktong petrolyo.
Ginsuportahan man ni Marcos ang mga tikang nga madugangan ang mga direkta nga biyahe halin sa Russia pakadto sa mga nagapanguna nga tourist destination sa Pilipinas.
