Mas nagabaskog pa ang Bagyo Francisco samtang padayon ini nga gina-monitor sa sulod sang Philippine Area of Responsibility (PAR).
Kahapon, Hunyo 21, sang ginkumpirma sang state weather bureau nga ginpasaka na sa typhoon category ang amo nga bagyo.
Sa alas singko sa kaagahon nga bulletin, nakit-an ang sentro sang bagyo sa 715 km nasidlangan sang Tuguegarao City, Cagayan. Dala sini ang kabaskugon sang hangin nga 140 km/h malapit sa sentro kag pagmadlos nga tubtub sa 170 km/h.
Nagahulag ini pa-nakatundan naaminhan nakatundan sa kadasigon nga 30 km/h.
Sa subong, ang mga lugar nga napaidalom sa Wind Signal No. 1 amo ang Batanes kag northeastern portion sang Cagayan lakip na ang eastern portion sang Babuyan Islands.
May warning lead time nga 36 oras kag may dala nga minimal to minor threat sa kabuhi kag propiedad.
Gina-forecast sang PAGASA nga magapabilin ang bagyo sa Philippine Sea sa bilog nga forecast period.
Posible suno sa ahensya nga magpalapit ang bagyo sa Extreme Northern Luzon kun may yara sang westward shift sa forecast track.
Ginalantaw nga magahina ini kag magagwa sa PAR sa Byernes.
Magluwas sa sini nga bagyo, gina-monitor man sang PAGASA ang isa ka low pressure area sa sulod sang Philippine monitoring domain.
Ulihi ini nakit-an sa kalayuon nga 2,900 km nasidlangan sang Southeastern Luzon. Manubo ang tyansa sini nga magdevelop bilang bagyo sa masunod nga 24 oras.#
.){kind=link}