Ginlista bilang isa sa mga testigo sang prosecution ang court sheriff nga ginsumbag anay ni Vice President Sara Duterte sang alkalde pa lamang siya sang Davao City sadtong 2011.
Matandaan nga natabo ang insidente sang Hulyo 2011 sang naakig si Sara sa court sheriff nga naga-insister sa pag-demolish sang mga balay sa sulod sang ginaagawan nga propiedad sa Barangay Soliman, Agdao, Davao City.
Indi lang isa kundi apat ka beses gid nga gintapungol ni Sara amo nga sheriff.
Una nga naigu ang sheriff sa wala nga mata kag ginpaathag sini nga gina-implementar lamang sini ang order sang korte apang ginsumbag pa gid siya ni Sara sa iya nawong.
Sa pre-trial brief, nakabutang nga ang tuyo sang prosecution sa pagpresentar kay Sheriff Abe Andres amo nga ipakita nga ang respondent ukon si VP Sara ang may yara sang tendency nga magpakita sang pagka-bayolente.
Nagapati ang panel nga ang testimoniya sang sheriff ang makabig nga “relevant and material” sa ikaapat nga article sa impeachment kay Duterte.
Ang amo nga article nagaakusar kay Duterte sa pag-kontrata sang assassin agud nga patyon si President Ferdinand Marcos Jr., First Lady Liza Araneta-Marcos kag anay-House Speaker Martin Romualdez.
Ginaakusaran man sa amo nga article si Sara sang paghimo sang grave threats kag inciting to sedition.
Magluwas sa sheriff, nalista man bilang “reserve witnesses” ang family member sang biktima sang pagpamahog kag psychiatrist.
Matandaan nga ang nangin basehan sini nga article ukon akusasyon kay Sara amo ang video press conference sini sang Nobyembre 2024 kun sa diin naakig ini kag nagpahayag nga may ginkontak na siya nga pananglitan may matabo sa iya, dapat nga patyon man si Marcos, si Liza, kag si Romualdez.#
