Nagapati si House prosecutor Bicol Saro Representative Terry Ridon nga mangin mabug-at nga ebidensya si “Mary Grace Piattos” sa isyu sang confidential funds batok kay Vice President Sara Duterte.
Isa si “Mary Grace Piattos” sa ginlista nga testigo sang prosecution team sa impeachment batok sa bise presidente.
Suno kay Ridon, importante ang amo nga pangalan bangud amo ini ang sentro sang kontrobersiya sa paggamit sang confidential funds.
Pahayag pa sang kongresista, ang isyu kun naga-eksister bala ukon wala si Mary Grace Piattos ang mahimo nga mangin “smoking gun” kun husto ukon sala ang paggamit sang amo nga pondo.
“Mahalaga ‘yung Mary Grace Piattos kasi nasa sentro siya ng kontrobersiya ng paggamit ng confidential funds. ‘Yung existence or non-existence ni Mary Grace Piattos, yun po ang smoking gun kung tama nga o mali ang paggamit ng confidential funds,” suno kay Ridon.
“Going back to the COA [Commission on Audit] reports, marami dun ang obviously, hindi tama ang paggamit ng confidential funds. Kaya nga in each and every year na may confidential funds ang Pangalawang Pangulo, may mga pinapasoli na pera sa kaban ng bayan,” dugang sini.
Una nga nabulgar sang 2024 ang amo nga pangalan kadungan sang hearing sang House good government and public accountability sang gina-usisa ang mga resibo ni Sara kun paano gin-gamit ang iya confidential funds sa Office of the Vice President kag sa Department of Education (DepEd) sang siya pa ang secretary sang ahensya.
Si Mary Grace Piattos ang isa sa gin-lista ni Sara nga nagbaton sang confidential funds apang nabulgar paagi sa Philippine Statistics Authority (PSA) nga wala sang birth, death ukon anuman nga identification records sang tawo nga may ngalan nga “Mary Grace Piattos.”
Didto kag nag-umpisa nga nabukaran ang mga pangalan nga lunsay kontrobersyal kag ginapatihan nga wala man naga-eksister.
Ginpamangkot naman si Ridon kun paano nila ipresentar ang witness pananglitan nga wala man ini naga-eksister, apang suno kay Ridon, bantayan na lang ini ugaling.
Nagsabat naman ang defense team nga prerogative man sang prosekusyon kun dal-on nila ukon ipresentar si Mary Grace Piattos. Suno kay Atty. Michael Poa nga isa sa mga abogado ni Duterte, handa sila nga mag-cross examine sa iya mangin statement.
“Ang narinig ko, I think kaninang umaga lang, nabanggit daw that part siya ng witnesses ng prosecution. Well, that’s the prerogative of the prosecution. Sa amin nga, parati namin sinasabi, once they’re presented, they will be subjected to cross-examination on our part,” pahayag ni Poa.#
