Gin-anunsyo sang gobyerno sang Indonesia nga ila gin-deactivate ang ginabulubanta 4.7 million ka mga accounts sang mga kabataan nga wala pa naglab-ot ang edad sa 16-anyos.
Lakip social media platform nga gin-deactivate kaangay sang TikTok kag YouTube.
Ini kabahin sang bag-o nga regulasyon sang gobyerno sang nasambit nga pungsod batok sa paggamit sang social media sang mga menor de edad.
Suno kay Communications and Digital Minister Meutya Hafid, 4.1 million ka mga accounts sa Tiktok ang gin-deactivate.
Samtang, 600,000 ka accounts naman ang gin-delete sang YouTube nga sakop sang Google.
Ang ini nga mga platform ang kabahin sa ginatudlo high-risk social media services sa idalom sang regulasyon nga ginpagwa sang Indonesia sang bulan sang Marso.
Ang nasambit man nga regulasyon nagatuyo nga ipatuman man sa iban pa nga platform kaangay sang X, Meta kag Instagram, kag pati man ang Roblox.
Suno sa gobyerno sang Indonesia ang ini nga tikang ginapatuman agud maprotektahan ang mga kabataan batok sa cyberbullying kag social media addiction.
Ang ini man nga polisiya sang Indonesia kasunod man sa ginpatuman sang Australia kag United Kingdom sang nagligad nga tuig nga nagapatuman sang istrikto nga regulasyon sa mga online platforms.
