Patigayunon subong nga adlaw sa Liwasang Bonifacio sa Maynila ang ikatatlo nga adlaw sang protesta sang Iglesia ni Cristo bilang pagpakita sang suporta kay Senator Rodante Marcoleta.
Ini ang kasunod sang desisyon sang Quezon City Government nga bawi-on ang permit nga ila ginhatag para sa ikatatlo nga adlaw sang protesta.
Samtang, nagpahayag si NCRPO Regional Director Police Major General Anthony A. Aberin nga magadugang sila sang 1,000 ka kapulisan nga ideploy sa Liwasang Bonifacio agud masiguro ang seguridad kag kahilwayan sa lugar.
Magapatuman man ang kapulisan sang mga traffic management kag traffic schemes agud indi maapektuhan ang dalagan sang trapiko.
Dugang pa ni Asilo, wala pa sang opisyal nga pahayag ang Quezon City Government nahanungod sa pagbawi sang permit.
Ginapaabot nga magpaguwa sang pahayag ang Quezon City Department of Public Order and Safety agud ipahangop ang rason sang amo nga desisyon.
Suno pa sa iya, wala sang may natabo nga indi maayo ukon untoward incident matapos ginpahibalo sa mga nagaprotesta nga ginbawi ang permit para sa ikatatlo nga adlaw sang ila rally.
Nahibaluan nga ang protesta nga ginpatigayon kahapon nga adlaw amo ang ikaduha nga sunod-sunod nga adlaw sang pagtililipon sang mga miyembro sang INC sa People Power Monument, kag amo lamang ini ang adlaw nga may balido nga permit halin sa Local Government Unit.
Ang protesta naman sang Martes nga adlaw ang wala sang permit halin sa Quezon City LGU, nga nagresulta sa reklamo sang madamo nga mga commuter bangud ginpunggan sang mga raliyista kag mga salakyan ang dalagan sang trapiko.
Suno sa pila ka mga nagapartisipar sa rally, ang amo nga pagtililipon ginhiwat bilang pagpabutyag sang ila pagkontra sa ginapaabot nga kaso nga plunder nga ipasaka sang Office of the Ombudsman batok kay Senador Marcoleta nga myembro sang Iglesia ni Cristo.
Samtang, sang Miyerkules sang hapon, nagpahayag si Ombudsman Jesus Crispin Remulla sa media nga “wala sang nagbag-o” kag madayon gihapon ang pagpasaka sang kaso batok kay Marcoleta.
