Ginaangot sang Senate Committee on Women, Children, Family Relations and Gender Equality nga ginapamunuan ni Senator Risa Hontiversos ang natabo nga pagpangluthang sang duha ka mga estudyante sa Tacloban City sa impluwensiya sang online extremist network nga 764.
Ini ginakabig nga terrorist group sa Canada kag isa ka threat sa national security sang Estados Unidos.
Sa hearing nga ginpatigayon sang Senado nahanungod sa insidente sa Tacloban City kun sa diin tatlo ang patay, ginpahayag ni Hontiveros nga gina-target sang grupo ang mga menor de edad nga madali maimpluwensiyahan paagi sa mga online platform kag mga online game.
Ini agud ma-engganyo sila sa paghimo sang peligroso nga mga butang.
Gin-athag man sang Senador nga wala ini nagapanawagan sang pagdumili sang online gaming, kag ginpahayag sini nga ang kadam-an sang kabataan nagahampang lamang agud magpahuway, makig-abyan, magtuon kag malingaw.
Nahibaluan nga nagapanawagan ang iloy sang isa sa mga estudyante nga napatay nga panubuon ang edad sang criminal liability agud mapasabat ang mga menor de edad nga naghimo sang kaangay nga krimen.
Ginsuportahan man ini sang mga pamilya sang iban pa nga mga biktima, nga suno sa ila nga kulang ang subong nga layi agud may manabat sa nagluntad nga krimen.
Sa idalom sang Juvenile Justice and Welfare Act, ang mga kabataan nga naga-edad 15 anyos panubo sa tion sang paghimo sang krimen wala nadala sa criminal liability.
Nahibaluan nga ang duha ka suspek ang nagaedad sang 15 kag 14 anyos.
Suno kay Hontiveros, kabahin man sang ila nga gina-talakay ang mga problema sa mga kabataan nga nagaatubang sang peligro samtang nagagamit sang internet kag nagapakig-istorya sa iban online.
