Nagpaandam ang Iran nga ang tanan nga oil tanker nga magaagi sa Strait of Hormuz kinahanglan magsunod sa mga ruta nga gin-aprubahan sang ila gobyerno.
Suno sa militar sang Iran, ang mga barko nga indi magsunod sa ginpatuman nga ruta mahimo magapangatubang sang balos halin sa ila mga militar.
Ang ini nga paandam ginpasapubliko samtang padayon ang negosasyon sa tunga sang Iran kag Estados Unidos agud matapos ang nagapadayon nga inaway sa tunga sang mga ini.
Nagpahayag man ang Iran nga ang bisan ano nga pagpangsilabot sang militar sang Estados Unidos sa Strait of Hormuz ila man ini pagabaslan sang madasig nga akto.
Nahibaluan nga apisar sang mga nagligad nga pag-atake sa pila ka commercial ship, nagasugod na liwat ang pagdamo sang mga sakayang-pandagat nga nagaagi sa Strait of Hormuz.
Apang suno sa mga eksperto, nagapabilin nga delikado ang sitwasyon bangud sa padayon nga pagpamahog sa seguridad sang mga ini.
Sa pihak nga bahin nagahanda naman ang Iran para sa lubong sang ila napatay nga Supreme Leader nga si Ayatollah Ali Khamenei, samtang ginapaabot nga magapadayon ang pagpakig-istoryahanay para sa kalinong kun matapos na ang seremonya sang lubong sang ila nga Supreme leader.
