Ginapatambong sang Senate Impeachment Court si Vice President Sara Duterte sa pagsugod sang impeachment trial batok sa iya.
Ini magasugod sa Lunes nga adlaw, Hulyo 6.
Kon indi man makatambong mismo ang bise presidente, mahimo nga ang iya legal team ang magrepresentar sa iya.
Nahibaluan nga sa imbitasyon nga ginpadala sang korte kahapon nga adlaw Hulyo 3, ginapangabay ini nga magtambong sa pagbukas sang trial nga magaumpisa alas-2:00 sang hapon.
Pagahiwaton ang trial sa Session Hall sang Senado sa Pasay City.
Ginapangabay man ang bise presidente nga magsunod sa tanan nga mando, direktiba, kag mga desisyon sang Senado suno sa Konstitusyon kag sa mga pagsulundan sang layi.
Apisar ginpahayag sang legal team sang bise presidente nga handa sila sa pag-atubang sa trial, tubtob subong wala pa sang kumpirmasyon kun bala personal nga magatambong si Duterte sa amo nga adlaw.
