Ginpa-Bombo sang isa ka concerned citizen ang pag-operate sang mga colorum nga tricycle nga indi rehistrado sa Barangay San Isidro, Jaro, Iloilo City.
Sa mensahe nga ginpadala sa Bombo Radyo, ginpahayag sang nagreklamo nga may mga tricycle nga wala sang nagakaigo nga lisensya kag rehistro, apang padayon nga naga-operate sa lugar.
Ginpahayag man niya nga ginadampigan lamang kuno ang mga may permit nga tricycle, samtang ang mga pribado kag wala rehistro nga salakyan ang nagapadayon sa pagpasakay sang pasahero.
Dugang pa sang nagreklamo, may mga driver nga naga-operate apisar wala sang nagakaigo nga safety equipment, lakip na ang helmet.
Bangud sini, ginpanawagan sang nagreklamo sa natungdan nga usisaon ang amo nga isyu kag magpatuman sang akto agud masiguro nga tanan nga nagabyahe nga pampubliko nga salakyan nagasunod sa mga ginapatuman nga pagsulundan.
Nagpatigayon naman sang bag-o nga kasugtanan ang Barangay San Isidro upod sa mga transport groups agud mapahagan-hagan ang trapiko kag mapabaskog ang disiplina sa loading kag unloading area.
Sa interview sang Bombo Radyo kay Punong Barangay Ronela Juaneza, iya ginpahayag nga nagkasugtanay ang tanan nga transport groups nga ang unahan nga bahin sang loading area, malapit sa karsada, pagagamiton lamang sa pagkuha kag pagdrop-off sang mga pasahero.
Bangud sini, tatlo lamang ka salakyan ang pwede maghulat sa amo nga bahin agud malikawan ang pagginutok sang mga unit.
Pahayag pa ni PB Juaneza nga kinahanglan sundon ang sistema sang pila agud malikawan ang pag-unahay kag pag-inagaway sa pasahero.
Dugang pa sini, isa lamang ka salakyan ang dapat mag-drop off ukon magpasakay sang pasahero pagkatapos sini kag kinahanglan nga magbalik ang driver sa likod nga parking area agud maghulat liwat sang iya turno.
Pahayag pa ni PB Juaneza nga padayon ang pagmonitor sang barangay sa implementasyon sang kasugtanan.
Ang mga drivers nga makita-an nga wala nagasunod sa kasugtanan, pagakuhaan sang litrato ang ila salakyan kag ipalab-ot ang impormasyon sa natungdan nga ahensya, lakip ang Land Transportation Office (LTO).
Samtang, gin-ako ni PB Juaneza nga ang trapiko ang isa sa pinakamabudlay nga problema nga ginaatubang sang barangay kag nagapati ini nga masolbar kon magbinuligay kag may disiplina ang tanan nga drivers sa pagsunod sa ginkasugtanan nga mga patakaran.
