Box nga naga-unod sang tax records ni VP Sara, ginpabalik ni Chiz sa BIR

Ginmandu ni Senate impeachment court presiding officer Sen. Chiz Escudero ang pagpabalik sang “green box” sa Bureau of Internal Revenue (BIR).

Ang amo nga BIR box naga-unod sang tax records ni Vice President Sara Duterte kag sang iya bana nga si Atty. Mans Carpio.

Suno kay Escudero, wala pa sang legal nga mando halin sa impeachment court nga nagasiling nga dapat iturn-over ang selyado nga kahon sa Senado. Iya ginsugo nga ibalik ini sa BIR nga wala ginabuksan.

“This box was turned over to the Senate as part of the documents, including the Articles of Impeachment. However, the court is not yet in custodia legis of this box,” suno sa presiding officer.

Apang ginpahayag man niya nga mahimo ini nga mapakuha sang korte sa ulihi kon may mosyon nga ipasaka ang prosecution ukon ang defense nga nagapangayo sang subpoena para sa mga rekord.

Ang House of Representatives justice panel ang una nga nagpangayo sang tax records ni Duterte sang ila mga hearing may kaangtanan sa impeachment complaint sang Abril. Sa ulihi, nagdesisyon ang mga kongresista nga indi pagbuksan ang selyado nga kahon bangud sang kabalaka nga posible ini makalapas sa National Internal Revenue Code.#