Tatlo ka mga kahoy sa syudad sang Iloilo ang nagkalatumba kahapon, Hulyo 10, bangud sang mabaskog nga huyop sang hangin dala sang Enhanced Southwest Monsoon ukon Habagat nga ginpabaskog pa sang Bagyo Inday.
Sa report sang Iloilo City Emergency Operations Center, nahamtang ini nga mga kahoy sa Barangay Sta. Rosa, Tagbak kag sa Barangay Dungon A. sa Jaro; kag sa Barangay North Baluarte sa Molo.
Sa Barangay Dungon A. Jaro, isa ka awto ang nadalasa sang natumbahan sang kahoy.
Sa interview sang Bombo Radyo kay Punong Barangay Genoveva Cabulong, iya ginpahayag nga wala man sang nasamaran sa amo nga insidente.
Wala man napuruhan gid ang salakyan bangud nagsang-at ang mga sanga sa kable sang kuryente antes natumba ang kahoy.
Napatigayon naman ang clearing operation amo man ang yara sa duha ka separado nga barangay.
Nahibaluan nga gina-forecast nga magatupa gihapon ang pag-ulan subong sa madamo nga parte sang pungsod bangud sang Habagat kag mangin mabalod man ang kadagatan.
Base sa alas singko sa kaagahon nga weather advisory sang Philippine Atmospheric, Geophysical and Astronomical Services Administration (PAGASA) subong nga adlaw, Hulyo 11, napasaka sa Red Warning ang Barotac Nuevo, Dumangas, Iloilo City, Leganes, Mina, New Lucena, Oton, Pavia, Pototan, San Miguel, Santa Barbara, Tigbauan kag sa Zarraga.
Sa idalom sini nga status, ginpaandaman ang mga pumuluyo sa nasambit nga mga lugar sang posible matabo nga seryoso nga pagbaha.
Sa pihak nga bahin, ginpasaka naman sa Orange Warning ang Capiz, Aklan, Negros Occidental, Guimaras, Antique kag ang pila pa ka mga banwa sa Iloilo nga amo ang Ajuy, Alimodian, Anilao, Badiangan, Balasan, Banate, Barotac Viejo, Batad, Bingawan, Cabatuan, Calinog, Carles, Concepcion, Dingle, Dueñas, Estancia, Guimbal, Igbaras, Janiuay, Lambunao, Lemery, Leon, Maasin, Miagao, City of Passi, San Dionisio, San Enrique, San Joaquin, San Rafael, Sara, kag Tubungan.
Sa idalom naman sini nga status, posible suno sa weather bureau ang pagbaha sa manubo nga mga lugar kag pagtiphag sang duta sa mataas nga mga lugar.
Padayon naman nga nagapahanumdom ang awtoridad sa mga residente malapit sa baybayon amo man sa high-risk barangays nga magpreparar kag i-antisipar ang malain nga tyempo amo man ang mga risgo kaangay sang pagbaha.#
