Imbestigaran sang National Bureau of Investigation (NBI) ang ginaalegar nga mga iregularidad sa pondo sang sports complex sa New Clark City, Tarlac nga gin-gamit sa 2019 Southeast Asian Games (SEA Games).
Suno kay NBI Director Melvin Matibag, sang nagligad nga pagbisita sang ahensya sa New Clark City para sa ginapatindog nga 70-hectare NBI Academy, nakita nila ang sports complex.
Nakabaton sila sang impormasyon suno kay Matibag nga may ginabanta P10 bilyon nga pondo ang nalakip sa proyekto nga wala na-liquidate.
Dugang pa niya, isa ka kumpaniya halin sa Malaysia ang nagtukod sang sports complex kag ginpahayag nga wala ini nag-agi sa public bidding.
Suno kay Matibag, gilayon man nga nabayaran ang ginabanta P10 bilyon paagi sa congressional insertion sa General Appropriations Act (GAA).
Ginpahayag sang NBI chief nga kinahanglan ini imbestigaran bangud nagaguwa nga binilyon ka pesos nga pondo ang nagamit nga wala sang liquidation.
Dugang pa niya, daku ini nga kaso kag dapat mahibaluan kon may yara sang nalapas nga mga pamaagi sa paggamit sang pondo.
Samtang, natalana man nga usisaon liwat sang NBI ang kontrobersiyal nga SEA Games cauldron nga nagbalor sang masobra sa P50 milyon nga gin-ulan sang pagpakamalaot sang 2019.
Una na anay ginpanginwala ni Philippine Southeast Asian Games Organizing Committee chair kag subong Senator Alan Peter Cayetano ang mga alegasyon nga may anomaliya sa pagdumala sang SEA Games. Ginsiling sini nga bukas sila sa ano man nga imbestigasyon.
Sa subong, padayon pa ang imbestigasyon, kag sa bahin sang NBI, wala pa sang ginpangalanan nga posible nga mga respondent kag wala pa naanunsyo ang formal charges nga ipasaka.
Sa nagligad, matandaan nga ginkwestyon man sang Commission on Audit ukon COA ang paagi sang pagpatuman sang proyekto matapos ginlakip ini sa isa ka unsolicited joint venture proposal sa baylo nga ipaagi sa competitive bidding.
Suno sa COA, posible nga nakahatag ini sang undue advantage” sa pribado nga partner.
Nagpanawagan man anay sang Senate inquiry sang 2020 may kaangtanan sa ginabanta P9.5 bilyon nga loan halin sa government-owned nga Development Bank of the Philippines nga gin-report nga gin-gamit sa pagpondo sang proyekto, bisan ang pribado nga partner ang dapat kuntani magpanguna sa gasto sa pagpatukod.
